საბერძნეთი - მეტეორას მონასტრები

"ცასა და დედამიწას შორის გამოკიდებული" მეტეორას მონასტრები ის ადგილია, რომელიც საბერძნეთის მონახულებისას must visit ადგილებში შედის. აქ სამონასტრო ცხოვრება X-XI საუკუნიდან დაიწყო და 1988 წელს იუნესკოს მსოფლიო მემკვიდრეობის სიაში შეიტანეს. სამონასტრო კომპლექსში 24 ეკლესია-მონასტერი შედის, აქედან კი მოქმედი მხოლოდ ექვსია. ტაძრები ქვიშაქვის კლდოვან მასივებზეა აღმართული და ერთი შეხედვით მათ ბუნებრივ გაგრძელებას წააგავს. ნისლიან ამინდებში ისინი თითქოს ზეცაშია გამოკიდებული - სწორედ აქედან მოდის მათი ბერძნული დასახელებაც.

მეტეორას დამაარსებელი ბერები თავდაპირველად გამოქვებულებში ცხოვრობდნენ. შემდეგ ნელ-ნელა დაიწყეს მაღალ კლდეებზე მონასტრების მშენებლობა, რამაც დღევანდელ სურათამდე მიგვიყვანა. ძნელია იმის წარმოდგენა, რამხელა ჯაფა დაადგათ ამხელა კლდეებზე საშენი მასალების ასაზიდად.

რა უნდა გავითვალისწინოთ მეტეორაზე მოგზაურობისას?

აქ მოგზაურობისთვის საუკეთესო პერიოდი გაზაფხული და შემოდგომაა
გზადაგზა ძალიან ბევრი სერპანტინია, ამიტომ, თუ მგზავრობისას ცუდად ხდებით, ჯობია წინასწარ მიიღოთ ზომები
მონასტრებში შესვლა ფასიანია - რამოდენიმე ევრო ღირს. საფასურს ადგილზე იხდით.
ჩაიცვით შესაბამისად - ვინაიდან მონასტრები ფუნქციონირებს, წესები ისეთივეა, როგორც ყველა ტაძარში - გრძელი კაბა და თავსაფარი (შარფი) .

სამონასტრო ცხოვრება აქ ყველაზე აქტიური XV-XVI საუკუნეებში იყო, შემდეგ ნელ-ნელა განიცადა უკუსვლა. დღეს, როგორც აღვნიშნეთ, სულ ექვსი მოქმედი ტაძარია : ფერისცვალების მონასტერი (დიდი მეტეორა), წმინდა ბარბარეს მონასტერი (რუსანუ), ღირსი ვარლაამის მონასტერი (ყოველთა წმიდათა), წმინდა ნიკოლოზ ანაპავსის მონასტერი, წმინდა სტეფანეს მონასტერი და წმინდა სამების მონასტერი.

მონასტრები ვიზიტორთათვის ღიაა დილის ცხრიდან შუადღის 1 საათამდე და შუადღის სამიდნ 5 საათამდე (ზაფხულის და ზამთრის სეზონზე, შესაბამისად). ყველა მონასტერს საკუთარი "დასვენების დღე" აქვს, ამიტომ ვიზიტი წინასწარ უნდა დაიგეგმოს მონასტრის კალენდრის შესაბამისად. შაბათ-კვირას ყველა მონასტერი ღიაა.