სედლეცის ადამიანის ძვლებით დეკორირებული აკლდამა

ჩეხეთში, ქალაქ კუტნა ჰორა-ში სედლეცის აკლდამა მდებარეობს. ერთი შეხედვით არაფერი განსაკუთრებული  - გოთიკურ სტილში აგებული ეკლესია და პატარა სასაფლაო. მაგრამ ამ ადგილს ერთი საინტერესო ლეგენდა და ექსპოზიცია უკავშირდება.   ლეგენდის მიხედვით 1278 წელს სედლეცის მონასტრიდან ადგილობრივი აბატი იერუსალიმში გაგზავნეს. მან გოლგოთადან ერთი მუჭა მიწა ჩამოიტანა და სედლეცის სასაფლაოზე მოაყარა. შედეგად, სიკვდილის შემდეგ აქ დასაფლავების სურვილი ბევრმა ადამიანმა გამოთქვა. დღეს კი სედლეცი სხვა მიზეზითაა ცნობილი - აქაური აკლდამა ადამიანების 30-40 ათასი ძვლითაა მორთული. აქაური სასაფლაო 1100 წლიდან ფუნქციონირებს, გოთიკურ სტილში ნაგები ეკლესია  14-ე საუკუნეში აშენდა, ხოლო მეთვრამეტე საუკუნეში რეკონსტრუქცია ჩაუტარდა. როგორც უკვე აღვნიშნეთ, 1200-იანების შემდეგ ძალიან პოპულარული საბოლოო განსასვენებელი ადგილი გახდა. განსაკუთრებით გაიზარდა მიცვლებულთა რიცხვი ევროპაში შავი ჭირის ეპიდემიის დროს. მე-15-ე საუკუნის ბოლოს ძვლების მიწიდან აკლდამაში გადატანა დაიწყეს. ლეგენდის მიხედვით ძვლებს ნახევრად ბრმა ბერი ფრთხილად და სათუთად ალაგებდა პირამიდებად. იძახიან ,რომ ამ საქმის დამთავრების შემდეგ მას მხედველობა ისევ აღუდგა. ისტორიკოების მიერ მოწოდებული ოფიციალური ცნობების მიხედვით, ძვლებით აკლდამის დეკორირება ისე, როგორც ახლაა, მეთექვსმეტე საუკუნეში მოხდა. მათი ხელახალი გადაწყობა 1660 წელს მოხდა, ეკლესიის რესტავრაციის და განახლების დროს. სედლეცის სააბატო 1783 წელს გაუქმდა, მაგრამ მონასტერი შვარცენბერგების გვარის წარმომადგენლებმა იყიდეს და შეინარჩუნეს. ძვლების ექსპოზიცია ჩეხმა მეჩუქურთმემ ფრანტისეკ რინკმა განაახლა 1870 წელს. მან მოახდინა ყველა ძვლის გათეთრება და დეზინფექცია და საკუთარი შტრიხები დაამატა დეკორაციას.