ექსტრემალური პლაჟი - როცა რამოდენიმე მეტრის დაშორებით თვითმფრინავები დაფრინავენ

მაჰოს სანაპირო სენ-მარტენის კუნძულზე, სამხრეთ-დასავლეთ ნაწილში მდებარეობს. აქ არის მზე, ქათქათა ქვიშის პლაჟი, კრისტალურად სუფთა ზღვა და რაც ყველაზე მთავარია - შენს თავს ზემოთ რამოდენიმე მეტრის სიმაღლეზე მფრინავი ავიალაინერები. ეს სანაპირო პრინცეს ჯულიანას სახელობის საერთაშორისო აეროპორტის სიახლოვეს მდებარეობს, რომელიც მსოფლიოს ყველაზე სახიფათო აეროპორტების ათეულში შედის.       იმის გამო, რომ კუნძულის ფართობი ძალიან მცირეა, პლაჟი პირდაპირ ასაფრენი ბილიკის დასაწყისშია განთავსებული, რის გამოც  ლაინერები 10-20 მეტრის სიმაღლეზე ფრენენ, დამსვენებლების თავებს ზემოთ.     პლაჟის სიგრძე დაახლოებით 300 მეტრია, სიგანე - 15 მეტრი. ყოველი რეისის ჩამოფრენის ან აფრენის წინ დამსვენებლებს აფრთხილებენ რადიოს მეშვეობით, ხოლო პლაჟზე ალაგ-ალაგ განლაგებულ დაფებზე ფრენების განრიგია დატანილი. აქვეა გაფრთხილებების იმის შესახებ, რომ ავიალაინერების რეაქტიული ძრავებიდან გამოტყორცნილმა ჰაერის ნაკადმა ადამიანი შეიძლება დააზიანოს, ზღვაში გადაისროლოს ან/და მოკლას, თუმცა ეს ხელს არ უშლის ექსტრიმის მოყვარულ დამსვენებლებს იმაში, რომ ფოტოს გადასაღებად მორიგი ავიალაინერის აფრენას ან დაჯდომას მშვიდად დაელოდონ.       ამ ფოტოზე კარგად ჩანს, როგორ ატრიალებს ქვიშას ჰაერის მძლავრი ნაკადები. ეს პლაჟი მძაფრი შეგრძნებების მოყვარულებს და ფოტოგრაფებს შორის ძალიან დიდი პოპულარობით სარგებლობს, დაგვეთანხმებით - ფოტოები მართლაც შთამბეჭდავია.