ბატეთის ტბა

ქარელის რაიონში ძამას ხეობას თუ აუყვები, ერთ ადგილას გადასახვევი შეგხვდება. იქიდან უკვე ფეხით უნდა აუყვე ბატეთის ტბამდე. გზა სამი კილომეტრია, ტალახიანი, მცირე აღმართებით, მაგრამ ტყეზე გადის და ამიტომ ასვლა შედარებით იოლია. მარშუტი ერთდღიანია, თუმცა სურვილისშემთხვევაში კარვების გაშლაც შეიძლება. ბატეთის ტბა  მეწყერული წარმოშობისაა. ზღვის დონიდან 1313 მეტრზე მდებარეობს და ნაპირი არ გააჩნია. შერეული ტყით დაფარული გორებითაა გარშემორტყმული და ტბაში წითელ წიგნში შემავალი ტრიტონი ბინადრობს. ტბაში ბანაობა სასურველი არაა. უფრო მეტიც - მიუდგომელია, რადგან ციცაბო ნაპირები აქვს. აქ მოხვედრა შეიძლება როგორც დაქირავებული ტრანსპორტით, ასევე ავტოსტოპით. ქარელამდე მატარებელიც მიდის, რომელიც ძალიან იაფი  ღირს. ქარელიდან კი ავტოსტოპით წახვალ ან ადგილობრივ მძღოლს მოურიგდები, აგიყვანს და უკანაც დაგხვდება. მზიან ამინდში ასეთი ხედები იშლება გზადაგზა. ბატეთის ტბა ზაფხულში, როცა ყველაფერი მწვანეა. ბატეთზე ძალიან ბევრი კოღო იცის, ამიტომ წასვლისას აუცილებლად უნდა იქონიო თან რამე, კოღოს საწინააღმდეგო.  იმის მიუხედავად, რომ ძალიან მცირე ზომისაა, გარშემო შემოსავლელად ჯაგებში და ბარდებში მოგიწევთ ძრომიალი. ტბის ცალ მხარეს შვიტებით დაფარული "მინდორია". სინამდვილეში ეს წყალზეა ამოსული და ნაპირთან მიახლოებისას განსაკუთრებული სიფრთხილე უნდა გამოიჩინო. შვიტა ახლოდან...     ტბის მისადგომებთან. ბატეთი განსაკუთრებულად ლამაზი შემოდგომით, მზიან და თბილ ამინდებშია, როცა ტყე წითელ-ყვითელი ფერებით იფარება. რაც შეეხება საბანაკე ადგილებს, ტბის გარშემო ტყეში რამოდენიმე ადგილას შეიძლება კარვის გაშლა. აქვე წყალიცაა. მათ, ვისაც კოღო არ უყვარს, შეუძლიათ გადასახვევთან არსებულ დიდ მინდორზე დაბანაკდნენ, ოღონდ ამ შემთხვევაში ტბამდე ასვლა და მერე უკანვე ჩამოსვლა მოუწევთ, რაც შეიძლება მიმზიდველი არ იყოს.